La enirejo de la UK en Florenco, Italio, 2006.

Ĉiun jaron okazas monda kongreso en alia lando. Partoprenas ĉirkaŭ 2000 personoj kaj, kompreneble, ĉiuj parolas nur Esperanton (krom iuj, kiuj kelkfoje krokodilas).

Kion oni faras dum tiuj 8 tagoj ekde sabato ĝis la sekva sabato?

La unuan (aŭ duan) tagon okazas inaŭguro, en kiu ĉiuj partoprenas. Simile, la lastan tagon okazas ferma ceremonio por ĉiuj.

Kiam oni alvenas al la kongresejo, oni ricevas karton kun nomo, kongresa numero kaj la lando-nomo de la partoprenanto.

Dum la t.n. "interkona vespero" oni aŭdas muzikon, vidas budojn kaj promenas por trovi kaj saluti amikojn el aliaj kongresoj.

Aliaj komunaj aranĝoj:

- Nacia Vespero, en kiu esperantistoj (kaj aliaj) el la lando de la kongreso prezentas muzikon, kantadon, dancadon, prelegetojn, ŝercojn kaj simile.

- Teatro kaj koncertoj.

- Merkrede la kongresejo estas fermita. Ĉi tiun tagon oni povas partopreni en ekskursoj kun ĉiĉeronoj por vidi iom de la lando. Oni povas ripozi aŭ promeni en la kongresa urbo.

- Internacia Vespero, dum la antaŭ-lasta tago, en kiu la kongresanoj el ĉiuj landoj muzikas, kantas, dancas kaj simile. Estas mirinde vidi, kiom da talentaj homoj ĉeestas dum kongreso.

La fina aplaŭdo post sukcesa teatraĵo dum UK.

Se oni scias kanti, oni povas partopreni en la internacia koruso, kiu ekzercas sin unu horon ĉiutage. La koruso donas apartan koncerton kaj kantas dum la internacia vespero kaj dum la ferma ceremonio en la lasta tago.

Ĉiu kongresano ricevas kongresan libron kun programoj, priskribo de la aranĝoj kaj listo de la nomoj, adresoj, naciecoj kaj kongresaj numeroj de ĉiuj partoprenantoj. Se oni deziras kontakti alian kongresanon, oni skribas mesaĝon kaj metas la kongresan numeron sur la rendevuan tabulon.

Budo dum la interkona vespero, UK Florenco 2006.

Dialogo
(Kvar kongresanoj sidas en la kafejo kaj trinkas kafon kaj teon. Ili jam legis en la kongresa libro)

K 1.	Ĉu ni iru kune al la kongresa temo?
K 2.	Ne, mi deziras iri al la korea programo: ŭonbolismo.
K 3.	Tio estas interesa.
K 2.	Ĉu ankaŭ vi iros tien?
K 3.	Ne, mi vizitis ĝin dum mia pasinta kongreso. Nun mi volas vidi AIS, t. e. la Akademio Internacia de Sciencoj de San Marino. Mi tre ŝatas viziti novajn programojn, kiam mi ĉeestas kongreson.
K 2.	La AIS tute ne estas nova.
K 3.	Por mi ĝi estas. Mi ĉiam havas la saman problemon dum UK. Mi volas partopreni en 3 aŭ 4 diversaj programoj samtempe.
K 4.	Kio estas la kongresa temo? Mi tute forgesis.
K 1.	Lingvo kaj komunikado. Estas tre grava afero.
K 4.	Mi samopinias, sed Esperanto mem temas pri lingvo kaj komunikado.
K 2.	Ĉu vi akompanos min al la koreanoj?
K 4.	Ne, mi iros al japana go-ludo. Mi promesis skribi etan artikolon pri ĝi en nia loka gazeto.
K 1.	Kio estas go-ludo? Mi multfoje aŭdis la vorton.
K 4.	Go-ludo similas iomete al ŝako. Ĝi originas el Ĉinio, sed nuntempe ĝi estas plej populara en Japanio. Oni ankaŭ nomas ĝin ĉina ŝako. Oni ludas ĝin ankaŭ en aliaj landoj, ekzemple en Eŭropo. Ĉu vi volas veni kun mi por vidi ĝin?
K 3.	Ne, ĉi-foje mi certe volas viziti AIS.

(La kvar kongresanoj finas siajn kafojn kaj teojn kaj iras en kvar diversajn direktojn).

1. Kongresano antaŭ la rendevua tabulo. "Ĉu eble estas mesaĝo por mi?", ŝi pensas.
2. Japanaj kantistoj ekzercas sin por la Internacia Vespero.

Vortklarigoj

enirejo	pordo laŭ kiu oni eniras (ekz. domon).
krokodili	paroli sian propran nacian lingvon en Esperanto-rondo.
inaŭguro	malferma ceremonio.
karto	malgranda peco de papero aŭ plastiko.
t.n.	tiel nomata.
budo	tablo(j), sur kiu(j) kuŝas broŝuroj, gazetoj, libroj, ktp.
prelego	kiam unu persono parolas al grupo de aŭskultantoj.
ŝerco	tio, kio estas dirita aŭ farita por ridigi.
ĉiĉerono	gvidisto por fremduloj.
aplaŭdo	kunfrapi la manojn por montri sian kontenton.
koruso	grupo de homoj, kiuj kantas kune.
trejni	praktiki; ekzerci.
aparta	speciala.
ŭonbolismo	korea religio.
ĉeesti	esti prezentanta.
samopinii	havi la saman opinion.
ŝako	ludo, kiu konsistas el 32 figuretoj, ofte nigraj kaj blankaj, kiujn du ludantoj movas sur tabulo kun 64 egalaj kvadratoj.
go-ludo (aŭ goo-ludo)	Ĉina ŝako. Oni metas "ŝtonojn" sur tabulo por gajni teritorion. Granda avantaĝo de tiu ludo estas, ke komencantoj kaj spertuloj povas ludi kune je pli-malpli egala nivelo.
aliĝinto	persono, kiu pagis por partopreni en kongreso aŭ renkontiĝo.

Demandoj

1.	Ĉu UK ĝenerale okazas en la samaj lando kaj urbo?
2.	Kiom da homoj vizitas la kongreson?
3.	Ĉu oni povas vidi la naciecon de la aliaj kongresanoj?
4.	Ĉu tio, laŭ vi, estas bona aŭ malbona?
5.	Kio estas la Nacia Vespero?
6.	Kio estas la Internacia Vespero?
7.	Kio estas la Internacia Koruso?
8.	Vidu la programon. Elektu vian "tagon".
9.	Ĉu la kvar kongresanoj deziris iri kune al iu programo?
10.	Ĉu ili sukcesis?
11.	Vidu la liston de pasintaj UK-oj. Ĉu io surprizas vin?

Universalaj Kongresoj

Jaro	Kongresloko	Aliĝintoj
1905	Boulogne-sur-mer, Francio	688
1906	Genéve, Svislando	1200
1907	Cambridge, Britio	1317
1908	Dresden, Germanio	1500
1909	Barcelona, Hispanio	1500
1910	Washington, Usono	357
1911	Antwerpen, Belgio	1800
1912	Kraków, Pollando	1000
1913	Bern, Svislando	1203
1914	Paris, Francio	3739
1915	San Francisco, Usono	163
	(Ne okazis pro la eksplodo de la 1-a mondmilito)
1920	Den Haag, Nederlando	408
1921	Praha, Ĉeĥoslovakio	2561
1922	Helsinki, Finnlando	850
1923	Nürnberg, Germanio	4963
1924	Wien, Aŭstrio	3054
1925	Genéve, Svislando	953
1926	Edinburg, Britio	960
1927	Danzig	905
1928	Antwerpen, Belgio	1494
1929	Budapest, Hungario	1200
1930	Oxford, Britio	1211
1931	Kraków, Pollando	900
1932	Paris, Francio	1650
1933	Köln, Germanio	950
1934	Stockholm, Svedio	2042
1935	Roma, Italio	1442
1936	Wien, Aŭstrio	854
1937	Warszawa, Pollando	1120
1938	London, Britio	1602
1939	Bern, Svislando	1939
	(Ne okazis pro la eksplodo de la 2a mondmilito)
1947	Bern, Svisio	1370
1948	Malmö, Svedio	1761
1949	Bournemouth, Britio	1534
1950	Paris, Francio	2325
1951	München, Germanio	2040
1952	Oslo, Norvegio	1952
1953	Zagreb, Jugoslavio	1760
1954	Haarlem, Nederlando	2353
1955	Bologna, Italio	1687
1956	København, Danio	2200
1957	Marseille, Francio	1468
1958	Mainz, Germanio	2021
1959	Warszawa, Pollando	3256
1960	Bruxelles/Brussel, Belgio	1930
1961	Harrogate, Britio	1646
1962	København, Danio	1550
1963	Sofia, Bulgario	3472
1964	Den Haag, Nederlando	2512
1965	Tókyó, Japanio	1710
1966	Budapest, Hungario	3975
1967	(Tel Aviv)/Rotterdam, Nederlando	1265
1968	Madrid, Hispanio	1769
1969	Helsinki, Finnlando	1857
1970	Wien, Aŭstrio	1987
1971	London, Britio	2071
1972	Portland, Usono	923
1973	Beograd, Jugoslavio	1638
1974	Hamburg, Germanio	1651
1975	København, Danio	1227
1976	Athina, Greklando	1266
1977	Reykjavik, Islando	1199
1978	Varna, Bulgario	4414
1979	Luzern, Svislando	1630
1980	Stockholm, Svedio	1807
1981	Brasília, Brazilo	1749
1982	Antwerpen, Belgio	1899
1983	Budapest, Hungario	4834
1984	Vancouver, Kanado	802
1985	Augsburg, Germanio	2311
1986	Beijing, Ĉinio	2482
1987	Warszawa, Pollando	5946
1988	Rotterdam, Nederlando	2321
1989	Brighton, Britio	2280
1990	Habana, Kubo	1617
1991	Bergen, Norvegio	2400
1992	Wien, Aŭstrio	3033
1993	Valencia, Hispanio	1863
1994	Seoul, Koreio	1776
1995	Tampere, Finnlando	2443
1996	Praha, Ĉeĥio	2972
1997	Adelaide, Aŭstralio	1224
1998	Montpellier, Francio	3133
1999	Berlin, Germanio	2712
2000	Tel Aviv, Israelo	1212
2001	Zagreb, Kroatio	1691
2002	Fortaleza, Brazilo	1484
2003	Göteborg, Svedio	1792
2004	Beijing, Ĉinio	2031
2005	Vilnius, Litovio	2344
2006	Firenze, Italio	2209
2007	Yokohama, Japanio	1901
2008	Rotterdam, Nederlando
2009	Bialystok, Pollando

Go-ludo dum UK en Florenco, 2006. Juna francino ludas kun la japana majstro.
Ekzistas diversaj grandecoj de tabuloj por go-ludo.